Kæra Stjörnufjölskylda,

Velkomin í fyrsta fréttabréf Stjörnunnar! Með þessu viljum við hefja markvissari og reglulegri miðlun frá félaginu, þar sem við deilum því helsta sem er í gangi – og því spennandi sem er á leiðinni.

Fréttabréfið verður vettvangur fyrir nýjustu fréttir, verkefni, viðburði og samstarf, ásamt innsýn í starfið sem fer fram innan félagsins alla daga. Markmiðið er að halda ykkur upplýstum, vekja áhuga og byggja enn sterkari tengsl við Stjörnuna og samfélagið í kringum starfið.

Við erum rétt að byrja – og margt spennandi framundan.

SKÍNI STJARNAN!

STJARNAN KÖRFUBOLTI

STJARNAN HANDBOLTI

Handboltafár í Garðabænum

EM karla í handbolta er nýlokið og á meðan mótinu stóð var boðið upp á æfingar fyrir þá sem vildu prufa og hafa margir nýjir iðkendur komið í Heklu Höllina og prufað handboltaæfingar. Nýskráningum hefur fjölgað og iðkendafjöldinn hækkar sífellt.

Yngri flokkarnar hafa verið að spila á fjölliðamótum nánast um allar helgar frá því um miðjan janúar og gaman er að segja frá því að í mörgum aldursflokkum er Stjarnan með fjölmennustu flokkana bæði í karla og kvenna.

Unglingaflokkarnir hafa einnig verið að spila fjölmarga leiki upp á síðkastið enda var lota 2 af 3 að klárast hjá þeim.

HEKLUMÓT STJÖRNUNNAR

Það var heldur betur líf og fjör í Hekluhöllinni um helgina þegar Heklumót Stjörnunnar í handbolta fór fram. Einnig spiluðu meistaraflokkar félagsins þrjá leiki, þar sem karlaliðið spilaði tvo leiki og kvennaliðið einn. Höllin var því full af lífi, hraða og spennu frá morgni til kvölds.

Heklumótið heppnaðist afar vel og var mikil ánægja með mótið og fjölmargar framtíðarhandboltastelpur gerðu sér ferð til okkar. Stemming var frábær á mótinu sem og á leikjum meistaraflokkana, þar sem áhorfendur studdu vel við bakið á liðunum.

Að lokum viljum við þakka öllum sem komu að skipulagningu mótsins, þátttakendum og áhorfendum fyrir frábæra helgi í Hekluhöllinni, að auki allra sjálfboðaliða sem aðstoða viðuppsetningu á heimaleikjum meistaraflokkana. Án sjálfboðaliða væri ekki hægt að halda úti því frábæra starfi sem er gert í handboltanum.

SKÍNI STJARNAN

STJARNAN KNATTSPYRNA

Undirbúningur í fullum gangi hjá meistaraflokki karla

Meistaraflokkur karla í knattspyrnu hélt til Alicante þriðjudaginn 3. febrúar, þar sem liðið er í æfinga- og keppnisferð í undirbúningi fyrir komandi tímabil. Fyrsti leikur ferðarinnar fór fram 8. febrúar, þegar Stjarnan lagði úkraínska úrvalsdeildarliðið Karpaty að velli, 2–1. Gummi Kristjáns og Haukur Brink sáu um markaskorun Stjörnunnar í leiknum.

Strákarnir léku í gær síðasta leikinn í æfingaferðinni þegar þeir mættu 1. deildar liðinu B.93 frá Danmörku í gær.

Leikurinn endaði 3-2 fyrir okkar mönnum þar sem að það voru þeir Jóhann Árni og Haukur Brink sem skoruðu mörkin, sá síðarnefndi splæsti í tvö stykki.

Undirbúningurinn heldur áfram fyrir komandi tímabil sem hefst eftir 58 daga á útileik gegn KA.

Æfingaferð hjá meistaraflokki kvenna

Meistaraflokkur kvenna heldur í æfingaferð til Tenerife dagana 5.–12. mars þar sem liðið mun sameinast enn frekar og leggja grunn að komandi tímabili. Í ferðina fara 22 leikmenn ásamt sjö manna starfsliði og er hún skipulögð í samstarfi við 1000fet, sem hefur verið traustur samstarfsaðili félagsins undanfarin ár.

Æft verður við frábærar aðstæður með áherslu á taktík, gæði og ákefð, auk þess sem ferðin nýtist vel til hópeflis og uppbyggingar á liðsheildinni. Stemningin í kringum liðið er afar góð og ríkir mikill metnaður fyrir verkefnunum fram undan. Leikmenn munu vera virkir á samfélagsmiðlum og gefa innsýn í ferðina og lífið með liðinu.

Nýtt ár og spennandi vikur framundan!

Starf yngri flokka hefur farið mjög vel af stað á nýju ári og hefur verið mikil og skemmtileg mótaþátttaka að undanförnu. Eldra ár í 8. flokki karla og kvenna, sem og yngra ár í 7. flokki karla og kvenna, fór til Njarðvíkur í janúar og tók þátt í KFC mótinu.

Þá fóru eldri leikmenn 6. flokks karla á Þorramót Hauka í lok janúar. Fram undan eru einnig spennandi verkefni, en 6. flokkur kvenna og eldri leikmenn 7. flokks kvenna eru á leið á GeoSilica mótið í Keflavík sem fram fer 14. febrúar. Í 5. flokki er mikil virkni, en 5. flokkur karla er á fullu í Faxanum þar sem tíu lið keppa á okkar vegum. 5. flokkur kvenna er einnig virkur í Faxanum og tók auk þess þátt í GeoSilica mótinu í Keflavík um síðustu mánaðamót.

Almennt hefur starfið gengið afar vel og við höfum verið að fá til okkar nýja og skemmtilega iðkendur samhliða þeim sem fyrir voru. Vetrarfrí yngri flokka verður frá og með 21. febrúar til og með 1. mars.

Ný keppnistreyja handan við hornið!

Ný keppnistreyja knattspyrnudeildar Stjörnunnar er í undirbúningi og verður kynnt á allra næstu vikum. Á undan munum við greina frá framlengingum við styrktaraðila og bjóða nýja styrktaraðila velkomna til liðs við félagið.

Mátun í yngri flokkum hefur þegar átt sér stað og hefur gengið afar vel – spennan er að aukast!

STJARNAN FIMLEIKAR

Fréttir frá fimleikadeild Stjörnunnar

Síðustu vikur hafa verið viðburðaríkar og afar ánægjulegar hjá fimleikadeildinni okkar. Mikil gróska er í starfinu og gaman að sjá hversu vel iðkendur okkar eru að blómstra – bæði á æfingum og í keppni.

Frábær árangur á Þrepamóti 2

Þrepamót 2 í 4.–5. þrepi fór fram síðustu helgi hjá Gerpla og átti Stjarnan þar 20 glæsilega fulltrúa. Stúlkurnar stóðu sig með miklum sóma og sýndu glæsilegar æfingar.

Árangurinn lét ekki á sér standa:

• 7 stúlkur náðu 5. þrepi

• 4 stúlkur náðu 4. þrepi

Það er einstaklega ánægjulegt að sjá hversu vel stúlkurnar dafna og taka framförum. Framtíð áhaldadeildar Stjörnunnar er svo sannarlega björt! Mikil fjölgun hefur verið í iðkendahópnum og telur áhaldadeildin nú um 140 iðkendur. 

Yngri flokkar hópfimleika á fullu!

Yngri flokkar hópfimleikadeildar kepptu einnig á hópfimleikamóti á dögunum og stóðu sig frábærlega. Nýjar reglur hafa tekið gildi í hópfimleikum og var gaman að sjá hvernig liðin aðlöguðust þeim – gleðin og framfarirnar frá haustmótinu voru greinilegar.

Stjarnan sendi 5 lið til keppni:

• Þrjú lið í 4. flokki

• Eitt lið í KKY

• Eitt lið í 5. flokki

Stúlkurnar í 5. flokki voru að keppa í fyrsta sinn í hópfimleikum og stóðu sig einstaklega vel.

Næsta mót hjá yngri flokkum er í lok maí og því hefst nú mikilvægt undirbúningstímabil. Spennandi tímar framundan!

Æfingar í vetrarfríi og skráningar

Æfingar verða samkvæmt stundaskrá í gegnum vetrarfríið. Sumir hópar kunna að hefja æfingar fyrr og munu þjálfarar hafa samband varðandi það.

Við minnum einnig á skráningu í Fimleikafjör – við hvetjum alla til að tryggja sér pláss tímanlega.

Samvinna foreldra og þjálfara

Við í fimleikadeildinni viljum leggja áherslu á áframhaldandi góða samvinnu milli foreldra og þjálfara. Opin og jákvæð samskipti auka ánægju iðkenda og styrkja starfið okkar. Með samstilltu átaki getum við látið gildi félagsins blómstra í öllu okkar starfi – iðkendunum til heilla.

Verdensholdet kemur í heimsókn

Það sem er næst á dagskrá hjá fimleikadeildinni er stórviðburður! Í mars fáum við til landsins hið heimsþekkta sýningarlið Verdensholdet og verður haldin glæsileg sýning í samstarfi við UMFÍ og Verdensholdet.

Við mælum sérstaklega með að fylgjast með dansflokknum á Instagram – þetta er einn flottasti sýningarflokkur í dansi og fimleikum sem sést hefur á landinu.

📅 Sýningin fer fram 13. mars í Ásgarði.

Við hvetjum alla Stjörnumenn og aðra áhugasama til að mæta og upplifa einstaka stemningu!

Með kærri kveðju,
Fimleikadeild Stjörnunnar 💙

VERSLAÐU STJÖRNUFATNAÐ OG VARNING HÉR