Kæra Stjörnufjölskylda,

Vorið er á næsta leiti og með hækkandi sól færist líf og kraftur yfir allt starf Stjörnunnar. Vetrarfríið er að baki, páskar handan við hornið og framundan er einn stærsti og mest spennandi tími ársins hjá félaginu þar sem starfið blómstrar á öllum vígstöðvum.

Fótboltasumarið er að fara af stað og undirbúningur hefur staðið yfir af miklum krafti síðustu vikur. Æfingar, mót, skipulag og ótal klukkustundir sjálfboðaliða og starfsfólks liggja að baki áður en fyrsta flautið heyrist. Það er einstakt að finna eftirvæntinguna sem fylgir nýju sumri, ný tækifæri, ný markmið og ný augnablik sem skapa minningar til framtíðar.

Á sama tíma hefjast úrslitakeppnir í körfubolta og handbolta þar sem veturinn hefur byggt upp spennu sem nú nær hámarki. Þar kemur styrkur félagsins svo sannarlega í ljós; metnaðurinn, liðsheildin og ótrúlegur stuðningur úr stúkunni. Það er ekki sjálfgefið að standa í fremstu röð, það er afrakstur markvissrar uppbyggingar og öflugs starfs alla daga ársins.

En starfið er miklu meira en keppni og úrslit. Á hverjum degi eru hundruðir barna og ungmenna að mæta á æfingar, læra nýja hluti, efla sjálfstraustið og mynda vináttu sem endist langt út fyrir íþróttavöllinn. Þjálfarar, sjálfboðaliðar, foreldrar og starfsfólk leggja sitt af mörkum til að skapa umgjörð þar sem gleði, öryggi og fagmennska fara saman.

Það er þessi heild sem gerir Stjörnuna að því sem hún er samfélag sem vinnur saman, styður hvert annað og horfir fram á veginn með metnað og samheldni að leiðarljósi.

SKÍNI STJARNAN!

STJARNAN KNATTSPYRNA

Ný treyja, vor í lofti og Besta deildin handan við hornið.

Á dögunum kynnti knattspyrnudeild Stjörnunnar nýja keppnistreyju félagsins og hefur hún vakið mikla athygli.

Treyjan er nú komin í sölu og hafa viðtökurnar verið frábærar. Yngri flokkar félagsins hafa þegar farið í hópapantanir og bíða leikmenn spenntir eftir að fá sínar treyjur í hendurnar.

Það voru hins vegar leikmenn í 6. flokki karla sem fengu þann heiður að frumsýna treyjuna á Goðamótinu um síðustu helgi.

Við hlökkum til að sjá Stjörnufólk á öllum aldri klæðast nýju treyjunni í sumar!

Meistaraflokkar félagsins eru á fullu í undirbúningi fyrir komandi tímabil og tilhlökkunin er farin að magnast.

Leikmenn bíða spenntir eftir að flautað verði til leiks og ljóst að spennandi sumar er framundan.

Strákarnir hefja leik á Páskadag kl 15:00 þegar þeir fá annaðhvort Selfoss eða Augnablik í heimsókn þegar leikið verður í 32 liða úrslitum Mjólkurbikarsins.

Stelpurnar hefja leik í Víkinni gegn Víkingi föstudaginn 24. apríl kl. 19:15.

Árskort eru komin í sölu og hvetjum við alla okkar frábæru stuðningsmenn til að tryggja sér kort. Stuðningurinn úr stúkunni skiptir sköpum og skapar þá stemningu sem gefur liðinu aukinn kraft inni á vellinum.

Stuðningsmannakvöld knattspyrnudeildar fer fram fimmtudaginn 9. apríl kl. 18:00–23:00 í Stjörnuheimilinu.

Árskort gilda á viðburðinn! hittumst, höfum gaman og þéttum raðirnar!

Breytingar á starfi yngri flokka

Nokkrar breytingar hafa orðið á starfi yngri flokka. Andri Freyr, sem hefur haft yfirumsjón með minni boltanum, hefur þurft að breyta sínum högum en heldur áfram þjálfun hjá félaginu í 7. flokki karla og 4. flokki kvenna, sem er mikið fagnaðarefni.

Við bjóðum Elís Maron Hannesson hjartanlega velkominn til starfa, en hann tekur við yfirumsjón með 5.–8. flokki karla og kvenna. Við hlökkum til samstarfsins og áframhaldandi uppbyggingar á öflugu starfi.

Nýtt: IDP – einstaklingsmiðaðar æfingar

Stjarnan er að hefja nýtt og spennandi verkefni: IDP (Individual Development Plan) æfingar.

Æfingarnar verða í boði fyrir leikmenn frá eldra ári í 4. flokki upp í 2. flokk karla og kvenna og eru valfrjálsar til að byrja með.

• Áhersla á styrkleika og veikleika hvers leikmanns

• Hópar settir saman eftir þörfum

• 6 vikna æfingablokkir

• Lág ákefð (álagsstjórnun) en mikil gæðavinna

• Einstaklingsmiðuð þjálfun óháð getustigi

Orian Burzic mun leiða verkefnið ásamt þjálfurum félagsins.

Þetta er þjónusta sem er einstök á Íslandi og þekkist helst hjá atvinnumannaliðum erlendis, við erum því gríðarlega spennt að fara af stað!

Leikmenn eiga að vera komnir í sína hópa á XPS. Ef eitthvað er óljóst má senda póst á orian@stjarnan.is.

Eftir 6 vikna reynslutímabil verður kostnaður 1.000 kr. á viku, þar sem skráð verður í 6 vikna blokkir í senn. Gert er ráð fyrir 3–4 æfingum á viku fyrir skóla.

STJARNAN HANDBOLTI

Umspil - Breytingar & blómstrandi barna- og unglingastarf

Handboltatímabilið er langt á veg komið og bæði meistaraflokksliðin eru að hefja á næstu dögum leiki sína í umspili um að halda sæti sínu í efstu deild.

Kvennaliðið tókst á ótrúlegan hátt að forða sér frá beinu falli með því að krækja í tvö stig í síðustu tveimur deildarleikjum sínum á móti erfiðum andstæðingum. Í umspilinu taka þær á móti nágrönnum okkar í FH, fyrsti leikurinn er á sunnudaginn 29.mars kl:16:30 í Heklu Höllinni.

Karlaliðinu tókst að bjarga sér frá beinu falli úr efstu deild og taka því á móti Fjölni í umspilinu, fyrsti leikur þeirra verður á föstudaginn 27.mars kl: 19:30 í Heklu Höllinni.

Breytingar urðu á þjálfarateymi karlaliðsins, Sverrir og Tandri stýra liðinu í umspilinu og þakkar deildin Hrannari Guðmundssyni fyrir gott samstarf á síðustu árum.

Hvetjum alla Garðbæinga og Stjörnufólk til að mæta og styðja við bæði liðin í baráttunni um að halda sæti sínu í efstu deild. Stuðningur ykkar er afar mikilvægur.

Barna og unglingastarfið blómstrar hjá deildinni, fjölgun iðkenda í mörgum flokkum og mikið líf er á æfingum í Heklu höllinni. Yngstu flokkarnir eiga í flestum tilvikum eitt mót eftir á tímabilinu og unglingaflokkarnir eru að spila í þriðju og jafnframt síðustu lotunni á Íslandsmótinu. Í febrúar var haldin bikarúrslitahelgi á meðal yngri flokka, þar sem liðin spila úrslitaleik á stóra sviðinu með þjóðsöng og öllu tilheyrandi. Afar flott framtak hjá HSÍ og vel að þessu staðið hjá Haukum sem héldu þetta á Ásvöllum. Stjarnan átti tvö lið á þessari helgi, 6.flokkur kvenna eldri og 6.flokkur karla yngri.

Endurnýjun á þjálfarasamningum við núverandi þjálfara er langt á veg komin og því stefnir í það að deildin verði skipuð afar metnaðarfullum og hæfum þjálfurum í öllum flokkum á næsta tímabili.

STJARNAN KÖRFUBOLTI

ÚRSLITAKEPPNIN HANDAN VIÐ HORNIÐ!

Nú fer spennan að ná hámarki þar sem bæði meistaraflokkslið Stjörnunnar eru á leið inn í úrslitakeppnina eftir krefjandi og skemmtilegt tímabil. Þó að #veðrið gangi nú yfir þá er úrslitakeppnin í körfu vorboðinn ljúfi, lóan sem kemur til að kveða burt snjóinn. 

Undir lok tímabilsins varð liðið þó fyrir áfalli þegar bandaríski leikmaðurinn Ruth Sherrill meiddist og verður frá keppni. 

Meistaraflokkur kvenna endaði í 8. sæti deildarinnar og mætir sterku liði Hauka fyrstu umferð. Verkefnið er krefjandi en alls ekki óyfirstíganlegt og liðið hefur sýnt það í vetur að það getur staðið upp í hárinu á bestu liðum landsins. Haukar eru reynslumiklar, ríkjandi Íslandsmeistarar en okkar lið er með mikið af efnilegum stelpum sem vilja sýna sig á þessu sviði. 

Leikjadagskráin í einvíginu er eftirfarandi. Við ætlum að skapa góða stemmningu og stelpurnar ætla sér áfram úr einvíginu

• Leikur 1 – 30. mars kl. 19:30 (Ásvellir)

• Leikur 2 – 3. apríl kl. 19:30 (ÞG Verk höllin)

• Leikur 3 – 8. apríl kl. 19:30 (Ásvellir)

• Leikur 4 – 12. apríl kl. 19:30 (ÞG Verk höllin) ef með þarf

• Leikur 5 – 16. apríl kl. 19:30 (Ásvellir) ef með þarf
  

Meistaraflokkur karla kemur inn í úrslitakeppnina á góðu skriði. 

Tveir af okkar leikmönnum fengu verðlaun fyrir tímabilið. Orri Gunnarsson og Ægir Þór Steinarsson voru í fimm manna úrvalsliði deildarinnar og Ægir var einnig valinn varnarmaður ársins.

Síðasti leikur þeirra fór fram í gær gegn nágrönnum okkar á Álftanesi þar sem Stjarnan tapaði eftir skemmtilegan leik og endaði liðið deildarkeppnina í þriðja sæti, sem er gott eftir brösuga byrjun í haust. Liðið er þrátt fyrir tapið í góðum gír og klárt í baráttuna. 

Strákarnir hefja sína úrslitakeppni á miðvikudaginn þegar þeir taka á móti KR í ÞG Verk höllinni. Útlit er fyrir frábæra seríu á milli tveggja góðra liða. Þó að okkar menn hafi endað hærra í töflunni þá eru KR með frábært lið sem t.d. Er  ríkjandi bikarmeistari og auðvitað mikla hefð og sögu. 

Svona líta leikdagarnir út. 

Leikur 1 – 1. apríl 19:30 (ÞG Verk höllin)

Leikur 2 – 6. apríl 19:30 (Meistaravellir)

Leikur 3 – 10. apríl 19:30 (ÞG Verk höllin)

Leikur 4 – 14. apríl 19:30 (Meistaravellir) *ef með þarf

Leikur 5 – 18. apríl 19:30 (ÞG Verk höllin) *ef með þarf

Stjörnufólk þekkir stemmninguna sem framundan er,  þar viljum við vera. Til að það hafist þurfa okkar lið stuðning, náum við honum getur allt gerst. 

Miðasala í tengslum við úrslitakeppnina verður með öðru sniði en á leikjunum í vetur.

Allar nánari upplýsingar um framkvæmd miðasölu verður á Facebook síðu körfuboltans.

Færri miðar verða í boði en í fyrra á leikina, og má því vænta að uppselt verði á einhverja leiki, sem og miðaverð verður hærra en í vetur og munu allir þurfa að borga sig inn á leikina, óháð aldri.

Fyrir fyrstu heimaleikina mun upphitun byrja fyrr. Þangað munu mæta spekingar sem munu fara yfir úrslitakeppnina, spá í spilin og sjá hverjir möguleikar Stjörnunnar eru á móti sýnum andstæðingum. Þessir viðburðir verða auglýstir sérstaklega.

Sjáumst á vellinum.

Skíni Stjarnan!

STJARNAN FIMLEIKAR

Það hefur verið mikið fjör og frábær árangur hjá iðkendum fimleikadeildar Stjörnunnar undanfarna daga og vikur. Við viljum nýta tækifærið og fara yfir helstu fréttir og það sem fram undan er hjá deildinni.

Mikil gleði ríkti eftir Bikarmótið þar sem árangurinn var glæsilegur. 1. flokkur kvenna, 1. flokkur karla og meistaraflokkur karla urðu Bikarmeistarar 2026 og sýndu öll þessi lið mikinn styrk, metnað og liðsheild. Meistaraflokkur kvenna hafnaði í 2. sæti eftir harða keppni á milli liða. Öll liðin okkar stóðu sig frábærlega og deildin er afar stolt af þessum glæsilega árangri.

Bikarmót í áhaldafimleikum fór fram á sama tíma og Stúlkurnar í frjálsu þrepi lentu í 2. sæti á Bikarmóti eftir mikla samkeppni. Það er langt síðan að jafn sterk keppni og jafn mörg lið hafa sést í frjálsum æfingum, sem gerir árangurinn enn glæsilegri.

3. þrep hafnaði einnig í 2. sæti á Bikarmóti 3. þreps B. Það er frábær árangur hjá flottum og efnilegum stúlkum sem sannarlega eiga framtíðina fyrir sér. Stúlkurnar í 2. þrepi kepptu einnig á Bikarmóti og gerðu sér lítið fyrir; þær náðu þrepinu og unnu sér á sama tíma inn sæti á Íslandsmóti. Það verður spennandi að fylgjast með þeim á komandi mótum.

Varðandi æfingar næstu daga þá halda æfingar samkvæmt stundatöflu áfram í dymbilvikunni, en við biðjum foreldra vinsamlega um að merkja við mætingu eins og venjulega svo skipulagið gangi sem best.

Við viljum einnig minna á að páskafrí verður hjá öllum hópum dagana 2.–6. apríl. Æfingar samkvæmt stundatöflu hefjast aftur 7. apríl.

Sumartafla er nú í vinnslu og verður gefin út eftir páska.

Fram undan er svo stór og spennandi fimleikahelgi í Garðabænum þegar Ponsumót, Mótaröð og Vormót verða haldin í Stjörnunni dagana 23.–26. apríl. Af því tilefni verða engar æfingar á þeim tíma. Þetta verður stór og mikil fimleikahelgi sem fimleikadeildin er virkilega spennt fyrir.

Næst á dagskrá hjá okkar keppendahópum er Norðurlandamót unglinga hjá 1. flokki karla 18.apríl. Strákarnir hafa lagt mikið á sig í undirbúningi fyrir mótið og erum við hjá fimleikadeildinni virkilega stolt af þessum flotta drengja hóp sem fer fyrir okkar hönd á mótið.

Við þökkum ykkur kærlega fyrir stuðninginn, samvinnuna og allt það jákvæða bakland sem þið veitið iðkendum okkar á hverjum degi.

Með kveðju,
Fimleikadeild Stjörnunnar

SUNDDEILD STJÖRNUNNAR

Veturinn hjá sunddeild Stjörnunnar hefur gengið afar vel og starfsemin verið bæði öflug og metnaðarfull. Veðrið hefur að mestu verið okkur í liði sem hefur skipt miklu máli fyrir útistarfið, þó að þrumur og eldingar hafi einstaka sinnum sett strik í reikninginn. Þrátt fyrir það hefur æfingastarfið haldið sínu striki og framfarir verið greinilegar á öllum stigum.

Sérstaklega er ánægjulegt að sjá hversu sterkir hópar eru að koma upp í A hóp úr B og C hópum félagsins. Það endurspeglar gott starf þjálfara og þá uppbyggingu sem hefur átt sér stað undanfarin ár. Ljóst er að framtíð sunddeildarinnar er björt og að efnilegir sundmenn eru að stíga sín fyrstu skref á stærra sviði.

Með vorinu tekur við annasamur tími í mótahaldi þar sem sundmenn keppa á fjölmörgum mótum. Markmiðið hjá flestum er að ná lágmörkum og undirbúa sig fyrir stærstu mót sumarsins. Hjá okkur er það Aldurflokkameistaramót Íslands AMÍ sem fer fram um miðjan júní og verður spennandi að fylgjast með okkar fólki þar.

Starfið í yngri hópunum er jafnframt blómlegt og einkennist af gleði, leik og jákvæðu andrúmslofti þar sem áhersla er lögð á að byggja upp grunnfærni í sundi. Þar læra börnin að fara í kaf, ná tökum á fyrstu sundtökunum og kynnast íþróttinni á skemmtilegan og uppbyggilegan hátt.

Vetrinum lýkur svo með sameiginlegum leiktíma í Álftaneslaug í lok maí þar sem sundmenn fá tækifæri til að njóta, leika sér og fagna góðum vetri saman.

VERSLAÐU STJÖRNUFATNAÐ OG VARNING HÉR