KNATTSPYRNUDEILD STJÖRNUNNAR

Knattspyrnudeild Stjörnunnar hefur á síðustu árum fest sig í sessi sem eitt af fremstu félögum landsins, bæði þegar kemur að markvissu og öflugu starfi í yngri flokkum og öflugu afreksstarfi. Uppbyggingin hefur einkennst af miklum metnaði og framsýni þar sem lögð er áhersla á að skapa umhverfi sem styður við bæði einstaklingsþróun og liðsheild. Sú vegferð heldur áfram af fullum krafti, með það að markmiði að efla félagið enn frekar og tryggja áframhaldandi árangur til framtíðar.

Stjórn knattspyrnudeildarinnar var skipuð eftirfarandi aðilum: Sæmundur Friðjónsson, Einar Páll Tamimi, Áslaug Guðmundsdóttir, Helgi Hrannarr Jónsson og Valgeir Sigurðsson. Í lok tímabils 2025 lét Helgi Hrannarr Jónsson af stjórnarstörfum og þökkum við honum kærlega fyrir óeigingjarnt og dyggilegt starf í þágu deildarinnar undanfarin ár.

Þórarinn Ingi Valdimarsson var ráðinn í starf verkefnastjóra knattspyrnudeildar og hefur hann komið með mikinn kraft inn í starfið frá fyrsta degi. Ráðningin er liður í uppbyggingu á skipulagi deildarinnar þar sem starfsmenn sinna daglegum rekstri deildarinnar í samstarfi við sjálfboðaliða.

Rekstur knattspyrnudeildarinnar var krefjandi á árinu 2025 og undirstrikar mikilvægi þess að áfram verði unnið af aga og ábyrgð í fjármálum. Ljóst er að viðhalda þarf skýrri sýn á rekstur deildarinnar en hann þarf að vera sjálfbær til lengri tíma. Þó er vert að nefna að horfa þarf á nokkur ár saman þegar rekstur deildarinnar eru skoðaður þar sem góður árangur eins tímabils getur gjörbreytt tekjum deildarinnar árið eftir. Halda þarf áfram aðhaldi á gjaldahliðinni og tryggja markvissa tekjuöflun til að tryggja gott jafnvægi í rekstrinum. Með samstilltu átaki og áframhaldandi góðri vinnu er unnt að styrkja rekstrargrundvöll deildarinnar og skapa traustan grunn fyrir vöxt og árangur á komandi árum.

Ljóst er að á árinu 2026 þarf að skipta um gervigras á Samsung vellinum ásamt lagfæringum á öðrum völlum á Stjörnusvæðinu, en sú endurnýjun er nauðsynleg til að viðhalda þeirri fyrirmyndaraðstöðu sem félagið hefur byggt upp. Miðgarður, knatthús Stjörnumanna, hefur nýst okkur afar vel og er ótvíræður styrkur í starfi deildarinnar.

Knattspyrnudeild Stjörnunnar þakkar öllum stuðningsmönnum, sjálfboðaliðum, styrktaraðilum, starfsmönnum og aðalstjórn fyrir gott og farsælt samstarf á árinu 2025 og hlakkar til áframhaldandi samvinnu á komandi árum.

YNGRI FLOKKAR STJÖRNUNNAR

Yngri flokkastarf Stjörnunnar er í miklum blóma og heldur fjöldi iðkenda áfram að aukast. Iðkendur eru nú um 1.160 og staðfestir að Stjarnan er eitt stærsta og öflugasta félag landsins í knattspyrnu. Fjöldinn skýrist m.a. af vexti bæjarfélagsins og því trausti sem foreldrar og iðkendur sýna félaginu. Knattspyrnudeild heldur utan um 64 æfingar á viku og yfir 800 leiki árlega í 5.–2. flokki karla og kvenna.

Deildinni hefur tekist að halda góðum kjarna af þjálfurum og bætt við öflugum nýjum þjálfurum á öllum aldursstigum. Stjarnan er orðið eftirsóknarverðasta starfsumhverfið í yngri flokka knattspyrnu á Íslandi og sýnir það stöðu félagsins í greininni. Við erum nú með 31 þjálfara og 40–45 yngri aðstoðarþjálfara. Menntunarstig þjálfara er hátt og eru nánast allir þjálfarar komnir með UEFA B- eða UEFA A-gráðu, sem er mikill áfangi og endurspeglar þá áherslu sem lögð hefur verið á þjálfaramenntun undanfarin ár.

Við höfum aldrei verið jafn vel mönnuð í yngstu flokkunum og nú, enda brýnt að taka vel á móti þeim gríðarlega fjölda iðkenda sem knattspynudeildin tekur á móti á hverju ári.

Helstu breytingar sem urðu á árinu voru að Arnar Páll Garðarsson og Hilmar Árni Halldórsson yfirgáfu félagið og þökkum við þeim kærlega fyrir framlag sitt. Páll Árnason er áfram yfirþjálfari yngri flokka. Elís Maron Hannesson tók við yfirumsjón minni boltans og Orian Burzic kom inn í eldri flokkana og sér um innleiðingu Tactical Periodization. Andri Freyr Hafsteinsson sér áfram um ákveðin mál í fjarvinnu og Arnar Darri Pétursson er áfram markmannsþjálfari.

Meðal nýmæla á árinu má nefna IDP – Individual Development Pathway – sem Orian Burzic stýrir. Þetta felur í sér að félagið býður nú upp á aukaaæfingar fyrir alla iðkendur í þeim tilgangi að efla alhliða þróun hvers og eins. Stjarnan er fyrsta félagið á Íslandi til að bjóða upp á þetta og er það mikilvægt framfaraskref sem við hlökkum til að fylgjast með á næstu árum.

Þór Jarl Jónasson hefur tekið við styrktarþjálfun yngri flokka og komið afar vel inn í hópinn. Bragi Halldórsson heldur áfram sem sjúkraþjálfari yngri flokka og hefur unnið ótrúlega gott starf. Nýlega var FMS – Functional Movement Screening – innleitt þar sem allir iðkendur í 4.–2. flokki fara í mat og fá send einstaklingsmiðar æfingar í meiðslaforvörn. Þessi þjónusta er að fullu gjaldfrjáls fyrir iðkendur og er hún til fyrirmyndar í íslenskri unglingaknattspyrnu.

Kúlturvinnan heldur áfram undir forystu Páls Árnasonar og Orians Burzic og er það verkefni stöðugt að þróast. Samstarf við skóla í Garðabæ er orðið mjög öflugt og heimsækja þjálfarar skólana reglulega með góðum árangri. Í gangi er spennandi þróunarverkefni með Garðaskóla þar sem fyrirhugað er að bjóða upp á Íþróttafræðigrein fyrir nemendur í 9. og 10. bekk – verkefni sem vonandi verður kynnt fyrir öllum skólum í Garðabæ á næstu einu til tveimur árum.

Þjónustu- og ánægjukönnun meðal foreldra er framkvæmd árlega og gefur könnunin okkur gagnlegar vísbendingar sem nýtast markvisst til að bæta starfið enn frekar.

Stjarnan leggur áherslu á að iðkendur fái verkefni við sitt hæfi, að árangur sé mældur í lærdómi og framförum fremur en úrslitum, og að virðing, hugrekki og þrautseigja séu grundvöllur í öllu uppeldisstarf félagsins.

MEISTARAFLOKKUR KVENNA

Meistaraflokkur kvenna stóð sig með stakri prýði á árinu en liðið endaði í 4. sæti Bestu deildarinnar með 32 stig – 10 sigrar, 2 jafntefli og 11 tap. Niðurstaðan í heild var góð og styrkur að ná sæti í efri hlutanum, fyrir skiptingu deildarinnar.

Í bikarkeppni KSÍ féll liðið úr keppni í 16-liða úrslitum gegn Tindastól, en þrátt fyrir það gefur þátttakan dýrmæta reynslu og hvatningu til framtíðar.

Eftir tímabilið lagði Betsy Hassett skóna á hilluna eftir flottan feril með liðinu. Hún kom til Stjörnunnar fyrir tímabilið 2020 og lék yfir 100 leiki fyrir félagið, þar sem hún var lykilleikmaður bæði innan vallar sem utan.

Í lok tímabilsins lét Jóhannes Karl Sigursteinsson og Arnar Páll Garðarsson af störfum og Óskar Smári tók við sem aðalþjálfari. Við þökkum Jóhannesi Karl fyrir hans framlag og vitum að hann fylgist náið með liðinun enda Garðbæingur og stuðningsmaður í stúkunni. Samhliða væntum við mikils af Óskari Smára í hlutverki aðalþjálfara.

Fram undan er spennandi tími hjá liðinu með nýjan þjálfara við stjórnvölinn þar sem haldið verður áfram að byggja upp öflugt og gott lið. Ljóst er að meistaraflokkur kvenna mun verða sterkari með hverju árinu enda mjög öflugur leikmenn að koma uppúr yngri flokkum deildarinnar.

MEISTARAFLOKKUR KARLA

Tímabilið 2025 var kaflaskipt hjá meistaraflokki karla. Jökull Elísabetarson hélt áfram sem aðalþjálfari og var með sama þjálfarateymi og árið áður, fyrir utan að Björn Berg Bryde ákvað að hætta.

Liðið endaði í 3. sæti Bestu deildarinnar með 42 stig – 12 sigrar, 6 jafntefli og 9 tapleiki. Liðinu gekk ekki vel í úrslitakeppni Bestu deildarinnar en þar náði liðið aðeins að safna 2 stigum af 15 mögulegum, eitthvað sem er ekki í takt við væntingar sem gerðar eru til liðsins. Þrátt fyrir það náði liðið að tryggja sér Evrópusæti, sem er mikilvægt markmið og sýnir stöðu félagsins í íslenskri knattspyrnu.

Í bikarkeppninni komst liðið í undanúrslit en féll þar út á móti Val í hörku viðureign.

Meðal athyglisverðra tíðinda á tímabilinu var koma fjögurra erlendra leikmanna sem komu í sumarglugganum. Þar ber hæst að nefna Steven Caulker, sem hefur leikið með sterkum liðum á Englandi og kom með mikla reynslu inní leikmannahópinn. Virkilega skemmtileg viðbót við hópinn sem annars var mjög flottur.

Andri Adolphsson lagði skónna á hilluna eftir farsælan feril en hann spilaði yfir 300 leiki hér á landi með nokkrum liðum.

Hvað varðar leikmannasölur þá má nefna að Kjartan Már Kjartansson var seldur til Skotlands í júlí 2025 og Alexander Máni Guðjónsson til Danmerkur. Þessar sölur eru enn ein staðfesting á því að uppbygging yngri flokka félagsins hefur verið markviss og árangursrík undanfarin ár. Sterk tenging milli yngri flokka og meistaraflokka er lykilþáttur í þeim árangri.

Stemningin í stúkunni hefur oft verið betri og er það atriði sem við viljum leggja aukna áherslu á fyrir komandi tímabili. Þetta er áskorun sem við tökum alvarlega og stefnum að því að bæta úr á árinu 2026. Þar geta bæði stuðningsmenn og félagið í heild lagt sitt af mörkum til að skapa enn öflugri umgjörð í kringum liðin okkar.

Heilt yfir var árið 2025 gott hjá knattspyrnudeild Stjörnunnar og getum við litið bjartsýn á framtíðina.

Áfram Stjarnan!
Knattspyrnudeild Stjörnunnar