BARNA OG UNGLINGASTARF KÖRFUBOLTADEILDAR

Barna- og unglingastarf körfuknattleiksdeildar Stjörnunnar
Barna- og unglingastarf körfuknattleiksdeildar Stjörnunnar hefur vaxið hratt á síðustu árum og er í dag eitt öflugasta yngri flokka starf landsins. Iðkendur eru um 650 talsins, allt frá leikskólaaldri upp í elstu flokka, og hefur fjöldinn aldrei verið meiri.

Í starfinu er lögð áhersla á fagmennsku, gleði, framfarir og góða umgjörð fyrir alla iðkendur. Markmiðið er að skapa umhverfi þar sem börn og unglingar fá tækifæri til að þroskast sem einstaklingar og leikmenn, upplifa samstöðu og vellíðan og njóta þess að vera hluti af Stjörnunni.

Stjarnan sendir árlega fjölda liða til keppni á Íslandsmótum KKÍ og hefur yngri flokka starf deildarinnar verið eitt það öflugasta á landinu undanfarin ár. Félagið hefur átt fjölda liða í úrslitum Íslands- og bikarmóta og margir iðkendur hafa tekið þátt í afreks- og landsliðsstarfi KKÍ. Árangur er þó ekki aðeins mældur í titlum, heldur einnig í þeirri menningu, liðsheild og jákvæðu upplifun sem við viljum byggja upp í starfinu.

Deildin stendur einnig fyrir fjölbreyttu starfi utan hefðbundinna æfinga. Má þar nefna Stjörnustríð, öflugt minniboltamót í Ásgarði, auk tækniæfinga, styrktaræfinga, námskeiða í skólafríum og sumarstarfs þegar hefðbundið vetrarstarf liggur niðri.

Barna- og unglingaráð

Barna- og unglingaráð körfuknattleiksdeildar Stjörnunnar heldur utan um málefni yngri flokka í samstarfi við yfirþjálfara, rekstrarstjóra, þjálfara og stjórn deildarinnar.

Tilgangur ráðsins er að styðja við gott og uppbyggilegt starf fyrir börn og unglinga, efla samskipti milli iðkenda, foreldra og þjálfara og stuðla að vellíðan, jafnræði og góðri umgjörð í starfinu. Ráðið vinnur einnig að því að styrkja tengsl við foreldraráð hvers flokks og styðja við félagslegt starf, viðburði og önnur verkefni sem tengjast yngri flokkum.

Í Barna- og unglingaráði sitja:

• Heimir Örn Sveinsson, formaður 

• Ágústa Edda Björnsdóttir

• Einar Helgi Ragnarsson 

• Hulda Gísladóttir 

• Berglind Ósk Þormar 

• Selma Ósk Höskuldsdóttir 

• Anna Birgit

• Telma Björk Fjalarsdóttir

netfang: bogu.korfubolti@stjarnan.is

Liðsheild, gildi og menning

Á síðustu árum hefur deildin lagt aukna áherslu á liðsheild, jákvæða menningu og gildi í daglegu starfi yngri flokka. Markmiðið er að gera gildi félagsins að lifandi hluta af starfinu, þannig að þau birtist í hegðun, samskiptum og venjum iðkenda, þjálfara og foreldra.

Liðsheildarverkefni deildarinnar byggir á þeirri hugsun að árangur til lengri tíma verði ekki aðeins til með góðri þjálfun, heldur einnig með trausti, samvinnu, virðingu og jákvæðu hugarfari. Með verkefninu viljum við styrkja félagslega umgjörð, efla samkennd innan hópa og skapa umhverfi þar sem allir fá tækifæri til að vaxa og leggja sitt af mörkum.

Við erum stolt af árangri yngri flokka Stjörnunnar, en ekki síður af því að byggja upp starf þar sem börn og unglingar vilja æfa, læra, tilheyra og vera hluti af sterkri liðsheild.